Густариши ҳамкорӣ байни муассисаҳои илмии Тоҷикистон ва Чин баррасӣ гардид

ДУШАНБЕ, 19.06.2026 /АМИТ «Ховар»/. Имрӯз дар шаҳри Душанбе мулоқоти президенти Академияи миллии илмҳои Тоҷикистон Қобилҷон Хушвахтзода ва котиби ҳизбии Институти Русия, Аврупои Шарқӣ ва Осиёи Марказии Академияи илмҳои ҷамъиятии Чин  Ван Лэй баргузор шуд, ки дар он масъалаҳои ҳамкории илмӣ, таҳкими робитаҳои академӣ ва рушди таҳқиқоти муштарак мавриди баррасӣ қарор дода шуданд. Дар ин хусус ба АМИТ «Ховар» аз Академияи миллии илмҳо хабар доданд.

Дар мулоқот ҷонибҳо омодагии худро барои густариши ҳамкории минбаъда байни муассисаҳои илмии Ҷумҳурии Тоҷикистон ва Ҷумҳурии Мардумии Чин таъкид намуданд.

Мусоҳибон масъалаҳои ташкили ҳамоишҳои байналмилалӣ, мубодилаи олимону муҳаққиқон, татбиқи лоиҳаҳои муштараки илмӣ ва баргузор намудани экспедитсияҳои байналмилалии муштаракро бо иштироки олимони ҳар ду ҷониб муҳокима намуда, барои таҳкими минбаъдаи ҳамкории илмӣ изҳори ҳавасмандӣ карданд.

АКС: Академияи миллии илмҳои Тоҷикистон